O PATIO DOS SOÑOS DA CLASE DE CUARTO
Na
clase de cuarto tomámonos moi en serio iso de renovar o patio porque
é un lugar onde pasamos moito tempo e queríamos facer un bo
traballo.
Para
comezar, deixamos voar a imaxinación e cada un deseñou o seu patio
ideal. Xurdiron ideas de todo tipo; algunhas máis realistas e outras
un pouco máis irrealizables (a quen non lle gustaría ter no cole
unha piscina olímpica ou unha tirolina que dese a volta a todo o
patio?), pero iso é o bonito de soñar. Tamén investigamos
propostas doutros coles para inspirarnos e quitar ideas.
Outro
dos puntos importantes foi facer unha investigación sobre o patio co
que contamos, para analizar carencias e posibilidades de mellora.
Cada equipo realizou a análise dunha das zonas do patio fixándose
naquelas cousas que podíamos aproveitar e aquelas que precisaban
renovarse ou cambiar. Coa información obtida, fixemos unha posta en
común e comezamos a perfilar o patio dos nosos soños. Algo que
sempre tivemos en conta é que o patio dos nosos soños tiña que ser
un patio para todos, desde os máis cativos ata os maiores de sexto.
O
deseño da maqueta foi toda unha experiencia. Cada equipo estivo
encargado de traballar sobre cada unha das zonas do patio elaborando
os obxectos e aparatos que cos que nos gustaría contar. Facer a
maqueta requeriu tamén medir o noso patio e explorar que é iso de
facer escalas e a importancia de manter a proporción para non levar
sorpresas á hora de levar as nosas ideas á práctica. Na grande
asemblea defendemos a nosa maqueta cos mellores argumentos pero,
claro, é que tiñamos a nosa exposición moi ben preparada.
Unha
vez definido o patio dos soños do cole chegou a hora de poñerse
mans á obra. A clase de cuarto quedou encargada de deseñar e
preparar un circuíto e comezamos por analizar o espazo real co que
contamos e facer un deseño a escala. Isto supuxo un grande reto xa
que o patio é moi longo pero estreito así que tiñamos que poñer o
miolo a traballar duro para atopar un deseño funcional ao tempo que
divertido. Por suposto, tamén dedicamos un tempo a estudar e
aprender algo sobre seguridade viaria e os sinais de tráfico que
necesitabamos para o noso circuíto… a seguridade ante todo!
Cambiamos
o lapis e os folios polo xiz, o flexómetro, as escuadras, as brochas
e a pintura e baixamos o patio para elaborar o noso circuíto. Pronto
nos demos conta de que un traballo ben feito leva tempo e dedicación;
hai que ser meticulosos se queremos que o noso traballo quede
perfecto.
Perpendiculares,
paralelas, circunferencias e todo baixo este intenso sol de
primavera…agora sabemos que o traballo de campo é máis duro do
que parece, pero a verdade é que paga a pena porque o resultado será
froito das nosas cabezas, do nosos corazóns e das nosas mans.
